O persoal das antigas Factorías Vulcano de Vigo (agora Estaleiros San Enrique) urxiu este mércores que se despexe “canto antes” a “incerteza” sobre a concesión de dominio portuario do estaleiro, xa que esa “inseguridade” está a condicionar a firma de novos contratos e, por tanto, a xeración de emprego.
Así o trasladou o portavoz dos traballadores, Nicolás Sangabriel, quen lembrou que, nestes momentos, hai media ducia de operarios nas instalacións de Teis facendo labores de mantemento e supervisando a maquinaria, cadros eléctricos, guindastres e outras dotacións para preparar a reactivación industrial.
Segundo explicou, a nova dirección da empresa (que foi adquirida polo grupo Marina Meridional) está a manter conversas e contactos con posibles novos clientes, e elaborando orzamentos enfocados principalmente na construción de plataformas para renovables (enerxía eólica), reparación naval e construcións metálicas.
“Pero todos os potenciais clientes din o mesmo, falan da inseguridade de non saber que vai pasar coa concesión“, sinalou Sangabriel. Así, lembrou que a actual concesión, que caduca en 2027, formou parte do lote adquirido polos novos propietarios, pero hai un conflito aberto co Porto, que reclama a reversión da devandita concesión, alegando que quedou extinguida no momento en que Factorías Vulcano desapareceu.
Segundo sinalou, tanto se a concesión se mantén ata 2027, coma se o Tribunal de Conflitos Xurisdicionais (que se reunirá o 15 de marzo para abordar a cuestión) a dá por caducada, “o importante é que se aclare canto antes”.
No caso de que se manteña a concesión, “a entrada de traballo sería practicamente inmediata” e, en caso contrario, o persoal “rogará” ao Porto de Vigo que a saque novamente a concurso “con urxencia” para que San Enrique poida optar a ela. “O que non podemos é esperar ano e medio. Levamos parados xa dous anos, aos traballadores acabóuselles o paro“, apuntou, e lembrou que, dos 69 empregados que tiña Vulcano cando crebou, xa quedan só dúas ducias, despois de xubilacións, prexubilacións e saídas cara a outras empresas.
Outro portavoz do persoal, Fran Guizán, lamentou que o presidente do Porto “non quere recibir” aos novos donos do estaleiro, e sinalou que os traballadores pedirán reunirse co alcalde, Abel Caballero, para lembrarlle a importancia de “potenciar a industria”. “Pedímoslle ao alcalde, que é tan popular, tan representativo e ten tantas luces, que nos apoie”, afirmou.
“Isto é para nós algo máis que unha empresa, hai traballadores de segunda, terceira e cuarta xeración, (…) e é cuestión de vontade política, porque poderían retirar a reclamación (sobre a concesión”, manifestou.
