O presidente da Xunta, Alberto Núñez Feijóo, sinalou que “dar a nota” é “o eixo vertebrador” da “mestura de política frívola e de espectáculo” que atribuíu ao alcalde de Vigo, o socialista Abel Caballero, tras defender o rexedor que “hai máis xente” que acode a participar no Nadal vigués, co atractivo das luces, que ao Camiño de Santiago.
“Iso acredita o nivelazo político dese Concello“, dixo Feijóo, preguntado sobre esta polémica na rolda de prensa posterior ao Consello da Xunta. Ao seu modo de ver, entrar a facer esta comparación –o Nadal vigués co Camiño– é “tan absurdo” que non merece a pena “nin comentalo”.
“Oxalá o Nadal sexa un éxito en Vigo e o Xacobeo tamén o sexa, a pesar dalgún rexedor”, esgrimiu, antes de reivindicar que a el lle gusta “facer unha política que non consista en intoxicar ou paralizar”.
SINALIZACIÓN DO CAMIÑO
Precisamente, tras avanzar que en 2020 estará finalizada a sinalización de todos os itinerarios do Camiño, Feijóo criticara a Caballero (sen citalo expresamente) pola negativa a aceptar a sinalización autonómica da ruta xacobea.
“Todos os concellos de Galicia, Portugal e España aceptan os sinais do Camiño, menos un. É o único da Península Ibérica que non o fai”, reprobou o presidente galego.
Por outra banda, preguntado polos problemas xurdidos por mor das obras do futuro albergue de Vigo, o presidente sinalou que se estarán seguindo os pasos previstos para liquidalos.
“É a nosa competencia e estase facendo nunha inmoble propiedade da comunidade”, sinalou, para concluír que, se xorden dificultades, liquidaranse polas canles adecuadas.
