Nove persoas tiveron que ser evacuadas dun edificio de Baiona despois de declararse un incendio nun restaurante na planta baixa. Todas elas, segundo confirma o 112 Galicia, están en perfecto estado de saúde. Ao parecer, o lume orixinouse nun conxelador do almacén deste local de hostalaría, situado na rúa do Reloxo, tras o cal o fume propagouse por todo o establecemento.

Ocorreu sobre as 8,15 horas da mañá deste domingo. Nese momento, a Policía Local contactou co 112 para alertar do incendio. Deste xeito, a central de emerxencias puxo a situación en coñecemento dos bombeiros de Baixo Miño e de Vigo, do GES de Val Miñor, de Protección Civil e, como medida preventiva, de Urxencias Sanitarias de Galicia-061.