A Universidade de Vigo aposta por retomar a presencialidade total o próximo curso

Só haberá clases a distancia se os espazos ou as condicións sanitarias derivadas da pandemia non permiten acudir ás aulas.

Celebración da sesión do consello de goberno da Universidade de Vigo / Uvigo.

O consello de goberno da Universidade de Vigo aprobou retomar unha modalidade totalmente presencial para o próximo curso escolar 2021-2022, agás nos casos nos que os espazos ou as condicións sanitarias derivadas da pandemia non o permitan.

Nunha sesión celebrada este venres, o consello de goberno abordou as medidas para o próximo curso escolar, durante o que a modalidade mixta ou non presencial só se aplicará en situacións puntuais e de curta duración, como casos nos que se detecten gromos ou peches na localidade na que se sitúe un centro docente.

Tamén será posible unha modalidade que non implique a presencialidade total en titulacións, cursos ou materias nos que a capacidade dos espazos docentes que calcule a Unidade Técnica non o permitan. En todo caso, a normativa adaptarase ás medidas sanitarias establecidas.

Por outra banda, deuse luz verde ás contas anuais de 2020 e o nomeamento do director científico do CICbiomaGUNE, Luís Liz Marzán, como investigador distinguido da universidade, na que desenvolveu parte da súa traxectoria.

FINANCIAMENTO

Así mesmo, o reitor da UVigo, Manuel Reigosa, confiou en que as universidades galegas e a Xunta alcancen un acordo sobre o próximo Plan de financiamento antes de setembro, así como en que se produza o máximo consenso en relación co mapa de titulacións.

Adicionalmente, Reigosa avanzou a próxima apertura ao público do edificio situado no Berbés, que acollerá varios servizos prestados no campus universitario a partir de setembro.

Tras fracasar unha primeira negociación do servizo de mediación para desbloquear o conflito xerado pola proposta do Máster en Exercicio Terapéutico en Funcional en Fisioterapia entre as facultades de Fisioterapia, promotora do título, e a de Ciencias da Educación e do Deporte, realizarase unha segunda mediación. Do mesmo xeito, encargarase un informe a unha asesoría externa especializada.