O alcalde de Vigo, Abel Caballero, deu por sentado que a cidade “é sede do Mundial” tras a renuncia de Málaga, que si estaba na lista inicial. Nun audio difundido aos medios de comunicación, o rexedor reivindicou que Balaídos acollerá o Mundial de Fútbol 2030 xa que a retirada de Málaga “acaba de trastornar todo”. El criticou “todo o que fixeron”, ao seu xuízo, tanto o presidente da Xunta, Alfonso Rueda, como o presidente da Federación Española de Fútbol, Rafael Louzán, “para que Vigo non fose sede do mundial”. “Toda aquela inquina contra Vigo (…) desbaratouse”, apostilou, cargando tamén contra o PP e o BNG de Vigo. “Vigo neste momento é sede do mundial”, insistiu.