O presidente de Portos do Estado, Salvador de la Encina, reiterou o compromiso do Goberno central coa inclusión dos portos do noroeste da península ibérica no Corredor Atlántico de mercadorías.

Preguntado este martes antes de participar nun acto en Vigo, Salvador de la Encina defendeu que o “obxectivo” do Goberno pasa por fomentar a “conectividade” dos “portos de interese xeral” para España, unha actuación que se persegue mediante a súa conexión coas liñas ferroviarias de mercadorías.

Ademais, resaltou a aposta do Estado pola inclusión das vías ferroviarias do noroeste na rede básica transeuropea e afirmou que así llo trasladou a presidenta de Adif, Isabel Pardo. En concreto, o noroeste da península forma parte da rede global, a secundaria, pero a Comisión Europea trasladou ao Goberno a posibilidade de incluír estas liñas do Corredor Atlántico na ampliación da rede básica que se realizará en 2020.

O presidente de Portos do Estado detallou que, cando a mellora das liñas férreas do noroeste se contemple no período de financiamento europeo 2021-2027, o que sucederá se se inclúen na rede básica, poderá traballarse de cara ao comezo das obras.

OBXECTIVOS

Na mesma liña, o delegado do Goberno en Galicia, Javier Losada, defendeu o “compromiso” do Executivo central co Corredor Atlántico e o Mediterráneo para conseguir o “desenvolvemento de infraestruturas” nesas zonas e, deste xeito, a “fixación da poboación” nos seus territorios e a mellora da “competitividade” das súas empresas.

Losada lembrou que Adif desenvolve unha planificación de actuacións de modernización das vías ferroviarias do noroeste que permitirá que Galicia conte cunhas infraestruturas que faciliten o “desenvolvemento” do transporte de mercadorías por ferrocarril e a súa “loxística”. Adicionalmente, puxo en valor a “coordinación” levada a cabo por Portos do Estado coas distintas autoridades portuarias de face a conseguir a conexión das últimas coas liñas ferroviarias.