A San Silvestre de Vigo foi multitudinaria un ano máis, como vén sendo común desde que pasou de celebrarse no Parque de Castrelos, cuna do noso atletismo, ao centro da cidade (contorna da Alameda e Beiramar).
O número de participantes multiplicouse e tamén o esforzo por conseguir o premio ao mellor disfraz, único galardón en disputa posto que a proba non é competitiva.
Cada cidade celebra o novo ano á súa maneira. Así, en Madrid foron uns esixentes 10 quilómetros, nunha dura competición para a cabeza de carreira. En Vigo os 6 quilómetros da pasada edición convertéronse en só 4, e de feito os miles de participantes tiveron ata que agardar de pé uns intres sen poder avanzar no paso polas zonas máis estreitas do Casco Vello. Os menos adestrados aproveitaron para recuperar folgos.
En definitiva, a San Silvestre de Vigo consolidouse como unha proba aberta a tódolos públicos, coa que o maior número posible de persoas despiden o ano con ledicia.
