A delegada territorial da Xunta en Vigo, Marta Fernández-Tapias, mantivo este luns unha reunión con representantes da Asociación de Veciños de Teis para informar os traballos previstos no marco da primeira fase do proxecto de humanización da PO-323, no tramo comprendido entre o cruzamento desta estrada autonómica coa avenida Mariña Española e o IES Leixa, que consta dun investimento de 1,7 millóns de euros.

Tal como informou o Goberno autonómico nun comunicado, o proxecto consiste en humanizar un tramo duns 500 metros, establecendo medidas de protección aos peóns nun viario con características “moi urbanas”.

“Esta primeira fase da reforma da estrada ten en conta puntos singulares como as cruces con vías que dan acceso ao centro de saúde e á ETEA e a intersección coa Avenida da Mariña”, indicou a Xunta.

A actuación suporá un investimento de 1,7 millóns de euros, cun prazo de execución de 12 meses. Nos próximos días someterase a información pública o proxecto para que todos os interesados poidan facer suxestións.