A Xunta de Galicia decidiu prolongar dous meses —ata o 31 de marzo— a exposición en homenaxe ao arquitecto Antonio Palacios, instalada no Museo do Mar de Galicia. Segundo informou a Consellería de Cultura nun comunicado, a decisión tomouse nunha das últimas reunións do Padroado do museo, presidida polo conselleiro de Cultura, Educación e Universidade, Román Rodríguez.

A mostra abriu ao público o pasado mes de novembro e estaba previsto que continuase ata finais de xaneiro, pero agora farao ata o 31 de marzo “dada a gran acollida do público”. “A decisión responde o éxito de visitas rexistradas desde a súa apertura, con máis de 4.000”, explican.

Comisariada polo catedrático da Universidade de Santiago, Jesús Ángel Sánchez García, a exposición presenta máis de 200 pezas, algunhas nunca expostas. Entre elas, a réplica da maqueta do Plan Palacios para Vigo, elaborada por alumnado do IES Politécnico da cidade.

O público que visite a exposición poderá achegarse tanto á produción arquitectónica como ás inquietudes artísticas e ás iniciativas culturais de Antonio Palacios durante a súa traxectoria vital entre Galicia e Madrid. Farano a través de tres ámbitos: ‘Arquitecturas para a modernidade’, ‘Os apoios na tradición e na historia’ e ‘A construción dunha identidade’. Esta iniciativa enmárcase no programa de actividades impulsado polo Goberno autonómico con motivo do ‘Ano Palacios’.

ANIVERSARIO MUSEO DO MAR

Por outra banda, o Padroado abordou tamén na súa última reunión a celebración en 2022 do 20 aniversario do Museo do Mar. Acordaron traballar nunha programación conmemorativa “que contribúa á divulgación da institución, dos seus fondos e das numerosas actividades que promove para todos os públicos”.

Abordouse tamén o balance de 2021, que deixou unha elevada actividade no centro: pasou dos 21.219 visitantes aos 31.000. O maior aumento, indican, produciuse no verán. Durante os meses de xullo, agosto e setembro “duplicouse o número de visitas con respecto a 2020, ao pasar de 6.385 a 11.535”.