A comunidade de Montes de Teis conseguiu esta semana un dos seus obxectivos mais ansiados durante décadas, ser declarada Entidade ICCA, é dicir, “área conservada por unha comunidade local”.
Esta Certificación está avalada e promovida pola ONU Medio Ambiente, UNEP-WCMC, como organismo internacional, e un recoñecemento aos valores sociais, ambientais e económicos.
O proxecto da Comunidade de Montes de Teis, en palabras do seus propios membros, “naceu pola loita veciñal para paralizar o ataque medioambiental sufrido pola construción de Rande-Puxeiros na AP9 no seu paso pola Madroa, e que supuxo o espertar de moitas conciencias, que plasmaron na súa asemblea constituínte un proxecto medioambiental, seguindo un modelo conservacionista e de recuperación do monte autóctono galego”.
E dende a comunidade de montes denuncian que “a realidade e circunstancias que permitiron conseguir esta certificación foron construídas a pesar de todas as trabas das administracións local, autonómica e central, para o desenvolvemento do noso modelo de monte nun contexto periurbano”.
“Este recoñecemento vén a reafirmarnos na idea de que o modelo que defendemos, contra vento e marea, ten futuro, e así como antes que nós loitaron para poder deixarnos o monte que hoxe desfrutamos, estamos no camiño certo para que as vindeiras xeracións poidan herdar un monte periurbano con unha gran riqueza no ámbito medioambiental e paisaxístico”, selaron.
