O Concello de Vigo rehabilitará os 65 metros de galerías subterráneas baixo a fortaleza do monte do Castro, e porá en valor todo o conxunto, con paneis audiovisuais e outros elementos que permitirán recrear o asedio da fortaleza en 1.719. Así o anunciou este xoves o alcalde da cidade, Abel Caballero, que presentou o proxecto xunto coa concelleira de Patrimonio e presidenta da Deputación de Pontevedra, Carmela Silva.

O rexedor explicou que a intervención, valorada en 1,5 millóns de euros, terá un prazo de execución duns 10 meses, e a intención é que estea terminada a finais do ano que vén. Así mesmo, o Concello presentará esta proposta para que opte a financiamento con fondos Next Generation da UE.

Caballero explicou que este proxecto, coa denominación ‘A defensa de Vigo’, permitirá non só recuperar parte do patrimonio da cidade, senón tamén da súa propia historia. Tamén recalcou que se fará cun “coidado exquisito” con todo a contorna, declarado Ben de Interese Cultural (BIC).

ILUMINACIÓN E RECREACIÓN AUDIOVISUAL

Segundo detallou, os túneles restauraranse, incorporarase iluminación e unha instalación sonora para recrear os canonazos e o balbordo dese asedio, ocorrido no contexto das guerras entre o rei Felipe V e a Cuádrupla Alianza (Francia, Reino Unido, Países Baixos e imperio Xermánico).

A saída dos túneles será no patio de armas, onde se fará unha intervención museográfica, cun recito expositivo en forma de barco, paneis audiovisuais, etc. Por outra banda, instalaranse pezas didácticas noutros elementos da fortaleza, sinalizando e imitando as plantas dos baluartes defensivos.

O alcalde expresou o seu “entusiasmo” con esta iniciativa, e garantiu que se levará a cabo, aínda que non consiga o financiamento europeo, á vez que subliñou que recuperar os túneles e pór en valor a zona con ambientación do século XVIII é “unha idea brillante”.