InicioDeportesArrinca O Marisquiño nunha edición con recintos pechados e todas as localidades...

Arrinca O Marisquiño nunha edición con recintos pechados e todas as localidades adxudicadas

O fundador do festival recalca que a organización está xa traballando na edición do ano que vén, que podería significar "a volta a un Marisquiño máis real".

PUBLICADO O

- Advertisement -

O XX festival de deporte e cultura urbana O Marisquiño deu xa o pistoletazo de saída en Vigo, nunha edición “de transición”, marcada polas restricións derivadas da pandemia de Covid, con recintos pechados e sen máis público que o que conseguise a súa entrada (as localidades xa están esgotadas).

Na xornada deste venres quentaranse ‘motores’ con algunhas probas de categorías inferiores e adestramentos, mentres que as grandes citas de skate, BMX, descenso urbano, Break Dance ou Basket 3X3 desenvolveranse o sábado e o domingo.

A organización envorcouse este ano, dadas as especiais circunstancias nas que se desenvolverá o certame, en reforzar a difusión vía streaming e a repercusión internacional, unha repercusión case garantida dado o nivel dos deportistas participantes, entre os que están o canadense Ryan Decenzo (skate), o hispano-nixeriano Courage Adams (BMX), a viguesa Nerea Arambarri (basket 3X3) ou o ‘rider’ venezolano Daniel Dhers, recentemente chegado de Tokio cunha medalla olímpica de prata.

Debido á crise sanitaria, as probas disputaranse en zonas acoutadas e pechadas, e o acceso só será permitido a aquelas persoas que dispoñan de entrada. Para evitar aglomeracións, non haberá actividades fóra deses recintos, nin postos de comida ou de venda doutros produtos.

O público asistente non poderá comer nin beber nas bancadas, que serán desinfectadas entre as diferentes probas, e o uso de máscara será obrigatorio.

A SEGURIDADE COMO “GRAN OBXECTIVO”

Precisamente, o fundador do festival, Carlos Domínguez ‘Pity’, recalcou que, nesta edición do Marisquiño, a seguridade “é o gran obxectivo”, e sinalou, así mesmo, que a organización está xa traballando na edición do ano que vén, que podería significar, se a pandemia o permite, “a volta a un Marisquiño máis real”. Domínguez sinalou que, na vixésima edición do certame, o recoñecemento nacional e internacional é xa evidente, “pero non hai que relaxarse”.

Pola súa banda, a delegada da Xunta en Vigo, Marta Fernández-Tapias, puxo en valor a aposta do goberno galego, cunha achega de 242.000 euros, para que o festival non tivese que abandonar a cidade, despois do “recorte do 70 %” nas achegas de Concello e Deputación de Pontevedra. “Coa nosa achega conseguimos que estas institucións rectificasen”, engadiu.

Fernández-Tapias remarcou a importancia do Marisquiño, que conxuga atracción turística e deporte, na dinamización económica de Vigo e de Galicia e na súa proxección a nivel internacional, especialmente coincidindo co Xacobeo 21-22.

ÚLTIMAS

Axentes e funcionarios denuncian as condicións “extremas” de calor na Comisaría de Vigo

Medio centenar de axentes e funcionarios da Comisaría de Vigo-Redondela, convocados polos sindicatos policiais...

Detido en Vigo por unha agresión á súa parella

Axentes da Policía Local de Vigo detiveron a un home de 47 anos de...

Confirmados 4 anos de cárcere para un home que extorsionou a unha muller

O Tribunal Superior de Xustiza de Galicia (TSXG) confirmou a sentenza da sección quinta...

OPINIÓN.- Riscos ambientais e patrimonio local na Barroca de Navia

As ondas de calor soportadas no mes de xuño mostran con claridade a anomalía...