O alcalde de Vigo, Abel Caballero, considerou “xusto” o modelo establecido para a aplicación de “a máis importante rebaixa de peaxes que houbo nunca” na AP-9, que suporá a necesaria utilización do dispositivo de telepeaxe para beneficiarse da mesmas, e instou á Xunta a suprimir o custo dalgúns tramos das autoestradas da súa titularidade e a reducir as súas tarifas.

“Claro que estou contento de que haxa gratuidade entre Vigo e Redondela“, asegurou tras ser preguntado en rolda de prensa polo feito de que se vaia a requirir a utilización da telepeaxe para acceder á supresión da tarifa dese tramo.

“Esta decisión é importantísima, ten un custo moi importante e é xusto que se faga así porque estamos a pagar peaxes porque sendo Aznar presidente de España deulle unha indebida prórroga a Autoestradas (do Atlántico) que durará ata 2040”, resolveu o rexedor olívico, que puxo en valor que o Executivo que preside Pedro Sánchez “estea a resolver” esta situación.

Así as cousas, o alcalde de Vigo remarcou que a AP-9 “vai ter a máis importante rebaixa de peaxes que houbo nunca”, mentres reprobou que “o PP, que gobernou durante tantos anos o país, non fixese nada” a ese respecto. Deste xeito, Abel Caballero subliñou que “quen puxo a peaxe en toda a autoestrada” e “non fixo nada” para suprimir a peaxe de Rande “chámase PP”.

HOSTALARÍA

Doutra banda, Caballero lamentou que a Xunta “enfoque a súa acción” para evitar a propagación da pandemia na hostalaría, que “cumpre” a normativa establecida, e insistiu na necesidade “centrar” as medidas na prevención da celebración de botellóns.

Por iso, avanzou que, no marco da colaboración mantida recentemente, o Concello e o sector poñerán en marcha unha mesa de traballo co obxectivo de levar a cabo unha campaña de concienciación sobre os riscos do contaxio por covid-19 que se dirixirá a un público xuvenil. Paralelamente, sinalou que durante este fin de semana realizarase unha “vixilancia intensa” co obxectivo de previr a celebración de botellóns e reunións que non cumpran a normativa.

Noutra orde de cousas, Abel Caballero indicou que a partir deste sábado se estenderán as cintas que permiten dividir as praias da cidade para evitar aglomeracións. Así, explicou que ata o momento non fora precisa esta medida dado que a afluencia rexistrada nos areais permitía “garantir (o mantemento) da distancia (de seguridade)”.