O presidente da Xunta de Galicia, Alberto Núñez Feijóo, puxo en valor este martes que a cidade de Vigo chega ao Xacobeo 21-22 “co albergue que merece e que necesita“, e que abrirá as súas portas este xoves, cunha capacidade de 93 prazas, e tras un investimento de 1,6 millóns de euros. Unha obra polémica xa que o concello critica que se está incumprindo normativas urbanísticas.
Así o trasladou o titular do Executivo galego durante a inauguración do albergue ‘Juan Manuel López Chaves’, construído pola Xunta na Praza do Berbés, en pleno Casco Vello da cidade. No devandito acto, no que non faltou a música a cargo da Banda de Gaitas da Provincia de Pontevedra, o presidente da Xunta lembrou que o edificio non só prestará servizo aos peregrinos, senón que tamén supón a recuperación de parte do patrimonio dos vigueses, cunha rehabilitación respectuosa coa arquitectura mariñeira desa zona do barrio histórico.
O presidente aproveitou o acto para volver recalcar que o Xacobeo é “unha das pancas máis importantes da recuperación económica e da recuperación da esperanza” para os galegos, e lembrou as accións que tanto a Xunta como outros gobernos autonómicos polos que pasan as rutas xacobeas están a impulsar para pór en valor este “proxecto que conforma a historia de occidente”.
Nese sentido, reiterou as súas críticas polo feito de que Vigo sexa a única cidade que non accedeu a colocar sinalización do camiño nos seus espazos públicos. “É sorprendente que sexa máis fácil sinalizar o Camiño nos Picos de Europa que nesta cidade”, afirmou Feijóo que, no entanto, agradeceu a colaboración do sector hostaleiro vigués, que si aceptou colocar carteis indicativos nos seus locais.
O presidente galego tamén repetiu a súa mensaxe de que “o Camiño é seguro” e a rede de albergues tamén o son e, de feito, lembrou que Galicia ten á metade da súa poboación completamente inmunizada e “preto do 70 %” con polo menos unha dose da vacina antiCovid.
Finalmente, Núñez Feijóo lembrou as medidas de apoio postas en marcha polo seu goberno para axudar a hostaleiros, comerciantes e outros autónomos e microempresas, con “máis de 360 millóns de euros de fondos propios” distribuídos entre estes negocios, aos que habería que engadir os 234 millóns procedentes do Goberno central que “quedan por repartir”.
