O goberno municipal vigués abordará con Ryanair a próxima semana posibles rutas desde o aeroporto de Peinador, con vistas á convocatoria dun concurso público para adxudicar axudas para a promoción turística de Vigo por parte de aerolíneas.

Así o trasladou o rexedor, Abel Caballero, tras manter unha reunión telemática con responsables da compañía, e incidiu en que o Concello ten interese en “retomar” a relación con Ryanair, mediante un convenio “ou algo similar”, pero sempre coas condicións que establece a administración municipal.

De feito, Ryanair operou en Vigo durante varios anos tras adxudicarse un concurso de axudas públicas (por máis de 4 millóns de euros) para realizar promoción turítica da cidade nos seus voos. En 2019 abandonou a terminal viguesa, tras o desacordo co Concello pola súa pretensión de conseguir máis apoio económico e por expor realizar a promoción en voos operados fóra de Vigo.

Hai unhas semanas a empresa sorprendeu co anuncio de que volvería a Peinador con varios voos semanais con destino a Barcelona desde o próximo outono.

Caballero valorou que a empresa é “proclive” a reeditar o convenio para incrementar eses voos e operar novos destinos na primavera e verán do ano que vén. As condicións económicas serían “similares” ao anterior acordo, aínda que o alcalde matizou que “ten que haber un concurso público” para que outras empresas se poidan presentar.

Con respecto aos destinos, o rexedor explicou que esa cuestión será abordada nun próximo encontro, aínda que avanzou que, ademais de Barcelona, o goberno local pretende que se oferten voos internacionais. “O sistema anterior, de Dublin, Edimburgo e Bologna non era malo”, indicou.