A Fiscalía pide 22 meses de prisión para un home acusado dun delito de revelación de segredos e outro de coacción sobre a muller, tras enviar a unha familiar fotos íntimas da súa exparella, á que ameazou con difundir máis imaxes se non o desbloqueaba no seu teléfono.

O acusado, que será xulgado este xoves na sala do Penal 2 de Vigo, mantivo unha relación sentimental coa prexudicada ata principios de abril de 2020. Durante ese tempo, tomou varias fotografías, con consentimento da que entón era a súa parella, de carácter íntimo e sexual.

Posteriormente, enviou as fotos ao teléfono da súa irmá movido polo ánimo de atentar contra a esfera íntima da súa exparella. A continuación, desde o teléfono da súa irmá, envioulle unha mensaxe á vítima con ánimo de coaccionala para que o desbloquease e accedese a falar con el.

Nesa mensaxe, mostráballe catro fotografías íntimas e advertíalle de que tiña “moitas máis”. Así mesmo, ameazáballe con enviarllas ao seu pai ou imprimilas para colocalas pola rúa, a menos que o desbloquease.

A Fiscalía considérao autor dun delito de descubrimento e revelación de segredos e outro de coacción sobre a muller, e pide que sexa condenado a penas que suman 22 meses de prisión. Tamén reclama que se lle prohiba achegarse ou comunicarse coa súa exparella por un período de dous anos.