Delegados da CIG, encabezados polo secretario comarcal do sindicato, Alberto Gonçalves, levaron a cabo este xoves unha ocupación simbólica de Barreiras para reclamar a intervención pública do estaleiro e para pedir ás administracións a súa implicación no apoio do sector naval.

Gonçalves lembrou que o estaleiro Barreiras, en mans da división de cruceiros de luxo de Ritz-Carlton, “está paralizado” despois de que o cruceiro ‘Evrima’ fose trasladado a Santander para traballos de pintura. “Pero non hai garantía de que volva e probablemente o acaben alí”, alertou.

Así mesmo, apuntou que “non se coñece” o plan de viabilidade da dirección da empresa, en virtude do cal se solicitaron créditos por valor de case 40 millóns de euros á Xunta e á SEPI, e “tampouco hai pedidos en carteira”.

Por iso, a CIG instou a unha “intervención pública directa, que blinde a continuidade” do maior estaleiro privado de España. “Non podemos permitir que corra a mesma sorte que Vulcano”, advertiu Gonçalves, quen proclamou que “dotar a Vigo dun estaleiro público é primordial, para que faga de tractor, de motor da industria auxiliar“. A CIG criticou que os novos donos opten a axudas públicas sen aclarar o seu proxecto, e esixiu “control público” desas posibles subvencións.

O sindicato nacionalista denunciou que a actual situación de crise que afecta a varios estaleiros e auxiliares do naval ten “responsables”. Por unha banda, criticou que a Xunta “mira para outro lado” a pesar de ter competencias industriais, que o Goberno central “aposta por outras zonas” e non por Vigo, e engadiu que o goberno local e o alcalde, Abel Caballero, tamén “teñen que mobilizarse” e “dar a cara”.

Finalmente, Alberto Gonçalves criticou duramente o papel do comité de empresa de Barreiras, con maioría do sindicato UGT, por bloquear as protestas e fomentar a “desmovilización”. “Agora vemos o resultado”, lamentou e advertiu de que “a CIG non vai a calar” e vai continuar mobilizándose en defensa do naval e da industria na comarca.