O conselleiro de Presidencia, Xustiza e Deportes, Diego Calvo, insistiu en que a Xunta apoiará Vigo para ser sede do Mundial de Fútbol 2030: “Mantemos a mesma postura desde hai tempo”. Así o sinalou despois de ser preguntado sobre se se reuniría co alcalde da cidade olívica, Abel Caballero, logo de que o rexedor propuxese un encontro este venres, que foi rexeitado polo Goberno autonómico e pola Deputación de Pontevedra ao estar en plena campaña electoral.
Calvo lembrou que xa en 2022 a Xunta anunciou que apoiaría as cidades que fosen elixidas pola FIFA para ser sedes mundialistas, polo que o Executivo galego “vai estar aí”. Preguntado polo cambio de postura de Caballero, que nas últimas horas se amosou aberto a que o Goberno central financie parte das obras necesarias para que Balaídos poida acoller partidos do Mundial, Calvo vinculouno a que o rexedor prevé a derrota electoral de Pedro Sánchez. Con todo, dixo que a Xunta mantén a súa proposta de que o financiamento parta das catro administracións: Goberno, Xunta, Deputación e Concello.
