A Xunta Xeral de Socios de Nueva Pescanova aprobou este mércores as contas da compañía correspondentes ao exercicio de 2018, e nomeou a dous novos conselleiros, a proposta de Abanca (entidade que é a accionista maioritaria na multinacional pesqueira).
Segundo trasladou a empresa nun comunicado, o grupo pechou o ano pasado cunha facturación de algo máis de mil millóns de euros, e aumentou nun un por cento a venda de produtos do mar. Así, o resultado neto do exercicio 2018 foi de 5,4 millóns de euros, 5,1 millóns máis que en 2017 e 41 millóns máis que en 2016.
O presidente do grupo Nova Pescanova, Jacobo González-Robatto destacou que, por segundo ano, a pesqueira mantense “na senda do crecemento” e volve obter beneficios. “Logramos, primeiro, sanear e ordenar, logo equilibrar, e agora estamos nunha posición na que nos podemos encamiñar decididamente a crecer”, proclamou.
Por outra banda, a Xunta de Socios aprobou a ampliación do número de membros do Consello de Administración, que pasa de 10 a 12, coa incorporación de dous novos conselleiros a proposta de Abanca (entidade que se converteu en decembro pasado na accionista maioritaria de Nova Pescanova). Así, os dous novos membros deste órgano son José María Benavent Valero e Marco Neto Montero (en representación de Corporación Empresarial e Financeira de Galicia).
INVESTIMENTOS
O investimento do grupo en 2018 alcanzou os 41 millóns de euros, destinados, entre outras accións, á constitución da empresa Katei Alimentación (de elaboración de comida asiática para canles ‘retail’ e ‘food service’ de toda España); a ampliación de participación na india Abad Overseas; ou a adquisición da sociedade Unickfish.
Así mesmo, avanzou na renovación de parte da súa frota e está previsto que en xullo se entregue o buque ‘Lalandii’ para Namibia, e que se bote o primeiro dos que se están construíndo para a filial de Mozambique.
Segundo engadiu a empresa, están a finalizarse as obras do Pescanova Biomarine Center no Grove (Pontevedra), que será “un dos maiores centros de I+D+i de acuicultura de Europa” e cuxa inauguración se prevé para principios de 2020.
