O rescate dos dous tripulantes dun veleiro que quedou encallado fronte á costa de Oia na noite do venres puxo en alerta os servizos de salvamento marítimo, aínda que finalmente puideron regresar a terra polos seus propios medios e axudados por un percebeiro.

A embarcación quedou varada contra as rochas a dous quilómetros ao sur de Cabo Silleiro, nunha zona coñecida como Punta Centinela. Os dous ocupantes do veleiro, de orixe belga e francesa, recibiron atención sanitaria, sen que fose necesario o seu traslado a ningún centro hospitalario, segundo o 112 Galicia.

Pasadas as 23.00 horas do venres, os equipos de Salvamento Marítimo deron aviso das manobras de rescate a través da central de emerxencias. Tamén pediron a colaboración doutros medios por terra, aínda que a tripulación xa a estaba a axudar o percebeiro.

Segundo explicaron os técnicos do organismo estatal ao 112 Galicia, a embarcación presentaba unha vía de auga no casco. Esta circunstancia foi comprobada despois polos axentes da Garda Civil, que se desprazaron ao lugar da emerxencia a bordo do “Corvo Mariño”.

Como o rescate por terra se complicaba, organizouse un acceso por mar, no que estaba prevista a participación do Servizo de Gardacostas de Galicia. Con todo, tras confirmarse que as persoas estaban en terra e en bo estado, descartouse esta opción.