Mentres proliferan corporacións internacionais con millóns de euros en beneficios, pequenas iniciativas artísticas e sociais loitan por sobrevivir en entorno hostil ata que, ás veces, non lles queda outro fin que a morte.

Desde Xornal de Vigo falamos co ilustrador Federico Fernández, “Fredy” para os amigos e coñecidos, e de como o seu Halcón Milenario (Rúa Cervantes, 18) comezou de maneira casual, cunha exposición que levaba por nome”10 jóvenes valores”, e cuxo éxito social e mediático levou a continuar unha aventura chea de paixón e cor, durante 8 anos que rematan agora.

“Dá mágoa, pero como con calquera ruptura toca mirar hacia diante”, recomenda Fredy, coa ledicia de ter aportado o seu gran de area á cultura viguesa. As portas do Halcón Milenario pecharán por sempre o día 13 de abril (sábado pola mañá), cunha sesión vermú.

Todo remata da mellor maneira posible, cunha retrospectiva das obras que Federico Fernández foi levando a cabo durante estes longos anos de traballo. Estas ilustracións estiveran presentes en espazos artísticos de Bolonia, Frankfurt ou Pontevedra, pero nunca as expuxera de maneira conxunta.

O espazo foi derrotado polo sector financieiro: está embargado por un banco. Cae por pura lóxica mercantil.

“Foi o meu estudo, pero sobretodo foi un espazo expositivo con 4 ou 5 exposicións anuais, levadas adiante con esforzo extra, sen pensar no económico”, lembra Fredy.