O Concello de Vigo e a Universidade de Vigo iniciaron este mércores unha nova etapa nas súas relacións institucionais coa primeira reunión entre o alcalde, Abel Caballero, e a nova reitora da institución académica, Carmen García Mateo. O encontro serviu para poñer sobre a mesa varias áreas de traballo conxunto, entre elas a mobilidade cara ao campus, a creación de espazos de residencia para persoal investigador e o uso de dependencias da antiga ETEA.

García Mateo cualificou a cita como unha “reunión protocolaria” desenvolvida nun “ambiente moi cordial”, aínda que nela xa quedaron identificadas cuestións concretas que Concello e Universidade prevén desenvolver nas próximas semanas.

Entre elas figura a posibilidade de habilitar solucións habitacionais vinculadas á actividade investigadora, especialmente destinadas a persoal procedente doutros lugares ou que se atope en período de formación.

“Falamos especificamente de impulsar espazos habitacionais para investigadores, para acoller investigadores de fóra, investigadores en formación”, explicou a reitora tras abandonar o encontro.

Outra das cuestións abordadas foi a eventual cesión de espazos da Zona Franca situados na antiga ETEA, unha área na que a Universidade de Vigo conta xa con presenza e na que ambas as institucións prevén seguir estudando vías de colaboración.

“Pola parte da Alcaldía, a colaboración e a disposición son totais, e pola parte da Universidade tamén, como non pode ser doutra maneira”, afirmou García Mateo, quen asegurou saír da reunión con “boas sensacións”.

Revisión das conexións de autobús co campus

A mobilidade universitaria ocupou tamén parte do encontro. Caballero anunciou que trasladará á futura concesionaria do transporte urbano de Vigo a necesidade de analizar con detalle os desprazamentos do alumnado cara á Universidade.

O contrato do transporte público atópase actualmente en proceso de licitación e, segundo explicou o alcalde, a intención municipal é aproveitar a nova concesión para revisar as conexións existentes.

Caballero indicou que encargará á empresa adxudicataria que “estude moi ben cales son as rutas, as orixes e as formas en que veñen os rapaces e rapazas para ir á universidade e, polo tanto, rectificar, engadir e mellorar a recollida de estudantes na cidade”.

O obxectivo exposto polo rexedor é adaptar as liñas de autobús urbano que comunican Vigo co campus aos lugares de residencia e aos hábitos reais de desprazamento do estudantado.

Na reunión tamén se tratou a necesidade de buscar novos espazos para ampliar as actividades da denominada ‘universidade de maiores’, outra das materias nas que Concello e UVigo prevén manter contactos.

Caballero resumiu a súa posición tras o encontro como unha “sensación e o desexo de cooperación total” coa nova Reitoría.

O alcalde fixo ademais referencia á súa propia vinculación coa institución académica, ao asegurar que é “o catedrático máis antigo da UVigo” e definir a Universidade como a súa “casa”.

Máis alá desa relación persoal, Caballero situou a creación da institución entre os principais cambios experimentados pola cidade nas últimas décadas. “Como alcalde, a universidade foi o avance máis importante que Vigo tivo nunca. Ter traído a universidade, que a pelexamos durante moitos anos, e isto segue a ser unha necesidade vixente”, afirmou.