A Universidade de Vigo (UVigo) conseguiu un “éxito histórico” de taxa de ocupación de novo ingreso en graos ao rexistrar un 104%. En concreto, 3.902 persoas xa se matricularon nas 3.752 prazas de novo ingreso das titulacións de grao que a universidade olívica oferta para o curso 2024/2025.

Segundo o reitor, Manuel Reigosa, isto supón unha “marca histórica” de taxa de ocupación, “cos mellores datos de toda a serie histórica”. Precisamente estes datos centraron parte do informe co que o reitor iniciou a última sesión do consello de goberno deste curso, segundo recolle o diario oficial da universidade (DUVI).

En concreto, tras catro chamamentos para efectuar as matrículas de grao e dobres grao ofertados, o campus de Ourense contabiliza unha taxa de ocupación do 104,24%, con 1.058 matriculados en 1.015 prazas. En Pontevedra, esta porcentaxe é do 104,03%, con 801 novos alumnos en 770 prazas, mentres que en Vigo foi do 103,86%, con 2.043 novos alumnos en 1.967 prazas.