Fnac España e o Concello de Vigo anunciaron a primeira edición de Fnac Live, que se celebrará o 16 de agosto no auditorio de Castrelos e reunirá sobre o escenario a Fillas de Cassandra, Eladio y los Seres Queridos e The Rapants. Así o confirmou este mércores o alcalde de Vigo, Abel Caballero, quen valorou que estes concertos de Fnac se distinguen polo seu “sabor moi local”.

Pola súa banda, o director xeral de Fnac España trasladou nun comunicado que a compañía está “encantada” de traer Fnac Live a Vigo e a un espazo como o auditorio de Castrelos, cun cartel que “celebra o talento galego”. A xornada musical do 16 de agosto, de acceso gratuíto, completarase cun set de Bea Fernandes como DJ, de Radar Estudios.