O alcalde de Vigo, Abel Caballero, insistiu este venres en que a planta olívica do grupo automobilístico Stellantis si terá axudas do Goberno central, a pesar de que o Ministerio de Industria e Turismo non incluíu á fábrica nas novas resolucións provisionais da liña B da segunda convocatoria do Perte do Vehículo Eléctrico e Conectado (VEC), vinculados á cadea de valor industrial do vehículo eléctrico.

Nun audio difundido aos medios de comunicación, Caballero saíu ao paso tras as críticas vertidas pola conselleira de Economía, Industria e Innovación, María Jesús Lorenzana, quen lamentou a “discriminación” do Executivo a Vigo e as “falsas promesas” do PSOE e do rexedor olívico, que foron, segundo ela, “promesas electorais”.

Agora, Abel Caballero dixo que a Xunta “se equivoca”, reivindicado que Stellantis Vigo terá “todo aquilo que se lle dixo que ía ter”, aínda que sen dar datas concretas de cando se coñecerán as subvencións que, segundo dixo, se lle outorgarán.

“O Goberno de España asignará fondos europeos a Stellantis Vigo e asignará os fondos que necesita”, engadiu, indicando que o Executivo galego “non sabe do que fala”.

Todo iso despois de coñecerse as resolucións provisionais do Perte VEC II, onde se inclúen máis de 54 millóns de euros para Stellantis Figueruelas, pero ningunha axuda para Vigo. Respecto diso, a compañía valorou estas subvencións para a súa planta de Zaragoza e indicou que está á espera do próximo lote para coñecer a resolución provisional para Vigo.