A Universidade de Vigo (UVigo) e o grupo sanitario Ribera asinaron dous convenios cos que renovar e impulsar a colaboración entre ambas as entidades, renovando o convenio de adscrición ao devandito centro académico da Escola Universitaria de Enfermaría Ribera-Povisa de Vigo e creando unha cátedra en Innovación e Saúde.
Nun comunicado, ambos os organismos adiantaron que se trata dunha colaboración “estratéxica” que permitirá a posta en marcha de múltiples iniciativas conxuntas, tanto no ámbito da docencia como da investigación.
No caso do convenio de adscrición, é unha renovación do xa existente, asinado en 1991, debido ao cambio de titularidade de Povisa, unha vez foi adquirido polo Grupo Ribera Saúde, e a súa adaptación ás novas leis.
O vicerreitor de Titulacións e Innovación Docente, Alfonso Lago, destacou que o renovado documento establece o procedemento de acceso do persoal da Escola Universitaria de Enfermaría Ribera-Povisa aos diferentes programas de formación que se imparten na Universidade de Vigo, “entre eles, os cursos para profesorado novel, obrigatorios para as novas figuras de profesorado axudante doutor”.
Así mesmo, inclúese tamén o apoio e colaboración para o desenvolvemento da actividade investigadora do profesorado da escola, “o que permitirá a integración destes docentes nos grupos de investigación da UVigo e nos proxectos de investigación colaborativos entre ambas as entidades de acordo coa lexislación vixente”, recalcou o vicerreitor.
“No grupo Ribera temos un firme compromiso coa docencia e a formación continua dos traballadores do ámbito sanitario, e este convenio abre novas posibilidades, tanto académicas como laborais, aos nosos profesionais”, subliñou a conselleira delegada da compañía, Elisa Tarazona.
CÁTEDRA INNOVACIÓN E SAÚDE
Pola súa banda, a nova cátedra traerá consigo a creación dun programa de desenvolvemento académico-profesional que, entre outras cuestións, axudará á consecución do título de doutor aos docentes da Escola mediante a súa incorporación aos programas de doutoramento da UVigo.
Así mesmo, tamén se tratará de levar a cabo programas e actividades encamiñadas a potenciar o coñecemento e á utilización de novas técnicas e ferramentas coas que dotar ao alumnado e aos profesores da Escola de recursos de vangarda.
“Precisamente, un dos obxectivos principais da cátedra é que os docentes de Enfermaría nun futuro consigan o título de doutor e, por tanto, poidan participar en todas as actividades de investigación da Universidade, integrarse nos grupos que xa existen ou crear outros novos, gozar das axudas de investigación, de mobilidade, de doutoramento, entre outras”, indicou a vicerreitora de Investigación, Transferencia e Innovación, Belén Rubio.
