O persoal e estudantes da Escola Superior de Arte Dramática de Galicia (ESAD), en folga contra os recortes da Xunta nun país que a pesar de tódolos avances parece que non termina de apostar pola arte, conta tamén co apoio da Asociación de Actores e Actrices de Galicia (AAAG), sindicato maioritario na interpretación e dirección teatral en terras galegas.

O cadro de persoal da ESAD convocou varias folgas, as primeiras que vive este centro dende a súa fundación en 2005, para esixir a restitución do profesorado, que perdeu nos dous últimos cursos un total de seis docentes.

Tal e como informou o claustro de profesores nos últimos días, a dirección da ESAD reclamaba para este ano tres novas vacantes e a Consellería de Cultura, Educación e Ordenación Universitaria, tras o informe da Inspección de Educación, non só non concedeu ningunha, senón que eliminou outras tres. Dese xeito, adxudicáronse só 34 interinidades, cando en 2014 o centro chegou a contar con 42.

A AAAG aplaude a decisión de acudir á folga – secundada tanto polo persoal coma polo estudantado- por un conxunto de reivindicacións que, máis aló de pedir a recuperación das prazas docentes suprimidas, esixe a equiparación do centro ao réxime de estudos superiores, xa que na actualidade a ESADG expide un título equivalente ao título universitario de grao, pero a institución réxese pola normativa de Secundaria. A AAAG considera esta realidade administrativa lesiva tanto para o normal funcionamento do centro coma para os intereses formativos do alumnado.

A Asociación de Actores e Actrices de Galicia insta á Consellería de Cultura, Educación e Ordenación Universitaria a recuar na súa decisión de reducir as prazas de profesorado da ESAD, a escoitar as peticións conxuntas do seu cadro persoal e do estudantado e a asumir como propia a reivindicación de modificar a normativa que rexe o funcionamento da ESAD, para equiparar o seu funcionamento aos centros de estudos superiores.