O Concello de Redondela puxo en marcha medidas urxentes de aforro de auga potable en todas as dependencias municipais e nos espazos públicos, incluídas as praias, tras recibir unha comunicación de Aqualia sobre o descenso do volume de auga almacenada no encoro de Eiras. A alcaldesa, Digna Rivas, aclarou que Redondela non figura na listaxe de municipios que a Xunta sitúa en prealerta por seca, mais defendeu que as medidas se adoptan “por pura prudencia e responsabilidade anticipada”. Entre as decisións tomadas polo goberno local está o peche das duchas e dos lavapés nas praias, a suspensión temporal do baldeo das rúas e a eliminación do uso de auga potable nas fontes ornamentais.

O rego tamén queda reducido ao imprescindible para garantir a supervivencia das especies vexetais. O Concello fixo ademais un chamamento á veciñanza para que realice un uso responsable da auga tamén no ámbito doméstico. Nesa liña, pide evitar accións como lavar os coches con mangueira, encher piscinas ou regar en exceso hortas e xardíns particulares. Con estas medidas, Redondela busca anticiparse a un posible agravamento da situación e contribuír á preservación dos recursos hídricos mentres continúa o descenso das reservas no encoro de Eiras.