A conselleira de Infraestruturas e Mobilidade, Ethel Vázquez, avanzou este luns a licitación das obras de humanización das rúas Buenos Aires e Progreso da localidade pontevedresa do Porriño.

Segundo anunciou Vázquez, as actuacións na PO-329, que comezarán a executarse na próxima primavera, suporán un investimento da Xunta de Galicia de case un millón de euros. O obxectivo dos traballos, tal e como destacou a conselleira, é transformar a vía nunha rúa na que os vehículos “cederán protagonismo” en favor dos peóns.

Ethel Vázquez tamén explicou que a Plataforma de Contratos Públicos de Galicia recolleu este luns o inicio da contratación dos traballos para actuar nun tramo duns 700 metros no que “se reforzará a seguridade a pé dos veciños, ademais de mellorar a accesibilidade, así como o aspecto estético desta vía, favorecendo a súa mellor integración urbana”.