A alcaldesa de Porriño, Eva García de la Torre, parece decidida en eliminar o paso a nivel do Porriño, que leva 7 décadas cortando o centro da cidade. Tódolos esforzos, ata o de agora, non atoparon froito ningún.

Mais a rexedora de Porriño atopa “inaceptable” que, en lugar de eliminar o paso a nivel, se constrúa un paso subterráneo para peóns, ou un paso elevado, e promete “traballar nun proxecto que conseguirá que o tren deixe de pasar en superficie polo centro do Porriño”.

García de la Torre manterá un encontro cos distintos grupos municipais para trasladarlles o tratado coa presidenta de Adif, Pardo de Vera. É profundamente optimista: “A eliminación do paso a nivel está máis preto que nunca”, asegurou.

Paso a nivel de Porriño/ Miguel NuñezO seguinte paso será unha reunión co secretario de Estado de Infraestruturas para reflectir nos Orzamentos Xerais do Estado para 2019 o proxecto de eliminación do paso a nivel.

Os veciños do Porriño levan 70 anos demandando a eliminación dese paso a nivel, en pleno centro da localidade, por onde o tren pasa a gran velocidade, e por onde tamén cruzan peóns.

As demandas intensificáronse a raíz do descarrilamento dun tren a poucos metros dese paso, en setembro de 2016, que ocasionou a morte a catro persoas, resultando feridas medio centenar.