A moza Carlota Álvarez, do Porriño, gañou coa súa obra ‘Zafirada‘ o primeiro premio da categoría de videocreación do certame ‘Xuventude Crea’, organizado anualmente pola Consellería de Política Social.

O segundo premio recaeu no santiagués Luís Xavier do Rego, con ‘Raíces’, mentres que o terceiro compárteno os coruñeses Hugo Vales -con ‘O fin dos nosos días’- e Andrés Sanjurjo –con ‘Sen título’–. Ademais, fíxose unha mención de honra a óbra ‘Aves migratorias’ de Ariadna Cordal, de Cambados .

A directora xeral de Xuventude, Cristina Pichel, participou este sábado na final da especialidade de videocreación, que tivo lugar no Centro Galego de Artes da Imaxe, na Coruña. Desde alí, destacou a “implicación” e o “enxeño” dos participantes de cada ano, o que demostra a “creatividade” da mocidade galega.

Coa entrega dos premios de videocreación, o ‘Xuventude Crea’ concluíu as fases finais de todas as súas categorías. Os 13 restantes correspóndense con fotografía, artes plásticas, teatro, cociña, creación de videoxogos, danza moderna, deseño de xoias, grafiti, moda, música, poesía, novela curta e cómic.

O primeiro premio en cada especialidade recibe 3.000 euros, mentres que o segundo e o terceiro fanse con 1.500 e 1.000 euros, respectivamente. O xurado tamén pode outorgar mencións de honra, sen dotación económica.

A Consellería de Política Social destaca que a edición deste ano do ‘Xuventude Crea’ conseguiu unha marca de participación, con case de 500 mozos e mozos que presentaron as súas candidaturas, fronte ás 382 do ano pasado.