A provincia de Pontevedra rexistrou 32 terremotos entre a tarde do martes e a madrugada deste mércores, 30 deles no municipio de Ponte Caldelas, cunha intensidade máxima de 3,1 graos na escala de Richter. De tódolos xeitos, o Instituto Xeográfico Nacional considera que “a probabilidade” de que haxa un sismo “grande” na zona é “bastante baixa”.
Segundo os datos rexistrados polo Instituto Xeográfico Nacional (IGN), entre as 18:36 horas do martes 15 de maio e as 5:51 horas deste mércores rexistráronse 32 sismos de entre 3,1 e 1,5 graos na escala de Richter.
Fontes do Instituto Xeográfico Nacional explicaron a Europa Press que “a natureza é así” e recalcaron que nesa zona da provincia de Pontevedra “non hai ningunha falla coñecida”.
Por iso, o IGN enmarcou esta “serie de terremotos” dentro do normal e as mesmas fontes consultadas incidiron en que “a probabilidade” de que haxa un sismo “grande” é “bastante baixa”, pero non se pode “descartar ao 100%”.
Só un foi SENTIDO POLA POBOACIÓN
Neste sentido, as mesmas fontes do IGN resaltaron que da trintena de sismos rexistrados en doce horas, “só un foi sentido pola poboación”, o rexistrado ás 20:01 horas do martes a 11 quilómetros de profundidade en Ponte Caldelas, con 3,1 graos na escala de Richter.
“Esta serie sísmica non sabemos onde vai”, admitiron as mesmas fontes, que lembraron que noutras zonas de Galicia, como en Porto do Son (A Coruña), rexistráronse en ocasións anteriores series similares á de Ponte Caldelas.
“É un pouco para estar alerta”, abundaron, para insistir en que “non é preocupante”. “Estaremos atentos e vixiarémolo”, aseguraron.
