A fortaleza viguesa do Castro continúa a súa recuperación co proxecto de musealización que reabrirá os seus túneles e recreará a batalla naval de 1719.
Este luns, o alcalde de Vigo, Abel Caballero, acompañado pola presidenta da Deputación de Pontevedra e tamén tenente de alcalde de Vigo, Carmela Silva, achegouse ata o inicio das obras de recuperación da fortaleza do Castro co obxectivo de “recuperar a historia”.
A obra supón un investimento de 1.100.000 euros procedentes dos fondos do Goberno de España, concretamente do Ministerio de Industria, Comercio e Turismo, que asignou a Vigo pola súa capacidade turística.
Caballero cualificou a obra de “moi importante” e agradeceu ao Goberno de Pedro Sánchez o seu financiamento para o patrimonio histórico de Vigo.
Na súa rolda de prensa diaria, o rexedor vigués explicou que a primeira cuestión é a recuperación do túnel duns 60 metros de lonxitude e que terá unha iluminación que recreará o ambiente do asedio de 1719. Despois, porase en marcha a actuación do baluarte con pezas de aceiro.
“Isto é unha gran recuperación histórica e tamén unha gran acción turística”, concluíu Caballero.
