Renfe e Comboios de Portugal ofrecen desde o vindeiro luns, día 16 de xaneiro, e ata o 30 de abril un total de 12.600 prazas promocionais nos trens que unen as cidades de Vigo e O Porto.

O Tren Celta conta con catro traxectos diarios, dous en cada sentido, e xa se poden atopar asentos ofertados a 5,25 euros. Os billetes pódense adquirir a través de todas as canles de venda oficiais de Renfe.

Segundo informou Renfe nun comunicado, o prazo da promoción abarca períodos nos que se espera unha maior mobilidade de viaxeiros, para planificar as viaxes de Semana Santa ou Entroidos.

O Tren Celta Vigo-O Porto conta con dúas frecuencias diarias con saída de Vigo ás 8.58 e ás 19.56 e chegada a Oporto ás 10.20 horas e ás 21.18 horas, respectivamente.

Pola súa banda, os trens da liña O Porto-Vigo saen da cidade portuguesa ás 8.13 horas e ás 19.10 horas e chegan a Vigo ás 11.35 horas e ás 22.34 horas, respectivamente.