A socialista Patricia Otero tomou este mércores posesión como alcaldesa pedánea de Bembrive despois de que o pasado 1 de decembro o anterior rexedor deste barrio vigués anunciase a súa dimisión tras ser inhabilitado durante 12 anos pola Audiencia Provincial de Pontevedra.
A ata agora vocal da Entidad local Menor de Bembrive xurou o seu novo cargo ante a Constitución Española durante unha sesión extraordinaria celebrada este mércores. Fíxoo acordándose do seu predecesor, Marcos Castro, que non estivo presente no acto. “Todos sabemos os motivos polos que estamos aquí. Por iso quero dedicar as miñas primeiras palabras de agarimo a Marcos Castro por todo o tempo dedicado e compartido neste camiño”, sinalou.
Otero tamén comentou que “formar parte dunha xunta veciñal non faiche gozar de grandes privilexios nin de grandes achegas económicas senón máis ben todo o contrario”. “Isto implica grandes sacrificios para poder conciliar a nosa vida política coa laboral e tamén a familiar”, engadiu.
“Son consciente de que a tarefa de alcaldesa non é sinxela. Isto supón un maior compromiso se cabe pero, como levo facendo ata agora como vogal desta xunta veciñal, creo firmemente que a min e ao resto desta corporación sóbranos ilusión, determinación, compromiso e coraxe para facer fronte ao que nos queda de mandato. Seguiremos na mesma liña de axudar a todos os veciños”, sentenciou entre aplausos.
