Case 1.200 persoas sumaranse o vindeiro domingo, día 30 de outubro, á X Carreira Solidaria ‘Eu Móvome pola Esclerose Múltiple‘ organizada pola Asociación Viguesa Avempo, que pechou este pasado martes as inscricións para a proba presencial con 1.164 participantes anotados para os percorridos de 5 e 10 quilómetros e a ‘andaina’.
Por iso, dita asociación agradeceu o “gran apoio social” recibido nos últimos días tras o seu chamamento debido á crise que atravesa polos problemas de financiamento do evento.
Para poder seguir recadando fondos para a causa, a entidade manterá as inscricións abertas ata o domingo na modalidade virtual da carreira e os donativos a través do ‘Dorsal 0’ solidario.
Por iso, a organización confía en poder alcanzar os 1.700 participantes inscritos e así aumentar a recadación para manter con ela a contratación dun profesional, “imprescindible para a mellora da calidade de vida das persoas afectadas”. En total, ata agora hai 1.450 inscritos contando todas as modalidades.
