O Consello de Goberno da Universidade de Vigo (UVigo) aprobou este mércores un plan de “medidas urxentes” de aforro enerxético, que xa entrou en vigor co obxectivo de conseguir unha redución de entre o 25% e o 30% do consumo actual.

Tal como recóllese no Diario Oficial da Universidade (DUVI), a xestión da calefacción e a climatización dos edificios, a prohibición do uso de dispositivos de calefacción individuais eléctricos, o apagado de equipos cando non se utilicen ou o axuste da iluminación interior e exterior son as principais medidas de aforro enerxético contempladas no plan.

Esta iniciativa precede, a partir do próximo curso 2023/2024, á aplicación de medidas estruturais, como serán a planificación xeral da actividade universitaria entre as 08,00 horas e as 18,00 horas ou a centralización en menos edificios das actividades que se prestan en fin de semana ou en días non lectivos.

“Son medidas boas con independencia do prezo da enerxía, porque non podemos desperdiciala e temos que dar exemplo”, reivindicou o reitor, Manuel Reigosa, que avanzou que “viñeron para quedar”.

A presentación destas accións centraron a sesión ordinaria do Consello, na que tamén se rexeitou a tramitación da modificación do título de Grao en Publicidade e Relacións Públicas.