O Centro Mixto de Investigación Magna-CTAG mobilizará 3,9 millóns de euros ata 2025 co obxectivo de avanzar no desenvolvemento de armaduras de asentos de nova xeración para o sector da automoción.
Tal como informou a Xunta nun comunicado, esta nova estrutura, un do tres primeiros Centros Mixtos de Investigación creados, dará continuidade ás Unidades Mixtas de Investigación nas que o Goberno galego, a empresa e Centro Tecnolóxico de Automoción de Galicia (CTAG) xa investiron case 8,2 millóns de euros desde 2015 para avanzar nestas liñas de investigación.
Precisamente, este martes a directora da Axencia Galega de Innovación, Patricia Argerey, visitou as instalacións da compañía Magna Seating Vigo no Porriño (Pontevedra), con motivo do lanzamento deste Centro Mixto, que pretende desenvolver novos produtos de elevado valor engadido.
A directora destacou a contribución deste centro ao posicionamento de Galicia como xerme de proxectos de I+D+i de automoción de alto impacto, á mellora da capacidade de absorción de coñecemento e ao impulso á transferencia de resultados dos centros tecnolóxicos á industria.
Os Centros Mixtos de Investigación son unha das novidades da convocatoria 2022 do programa de Unidades Mixtas da Consellería de Economía, Industria e Innovación. Esta nova tipoloxía de alianza entre unha empresa tractora e un centro de investigación ten como obxectivo dar estabilidade a algúns dos proxectos máis importantes que se desenvolveron ata agora, segundo explica o Executivo autonómico.
