O Concello de Vigo prevé demoler a antiga cafetaría-miradoiro do Castro, para crear un novo espazo de zonas verdes e de paseo, segundo avanzou este mércores o alcalde, Abel Caballero.
Nunha rolda de prensa, o rexedor olívico explicou que esta actuación, para a que se destinarán 300.000 euros, será unha das obras que se acometan con cargo ao crédito extraordinario de máis de 25 millóns de euros procedentes de remanentes.
O período de concesión da cafetaría expirou en 2009 e o Concello denegou a prórroga aos titulares, polo que leva pechada desde entón. En 2014 convocouse un concurso para unha nova adxudicación, que quedou deserto; e en 2017, o alcalde anunciara unha nova licitación para “unha gran cafetaría”, que tampouco se concretou.
Este mércores confirmou que, finalmente, as antigas instalacións serán demolidas e acondicionarase toda a zona para crear espazos verdes.
Ademais desta actuación, o alcalde confirmou que, con cargo a ese crédito extraordinario, se levarán cabo tamén melloras en Bembrive (600.000 euros), a reparación da piscina municipal de Teis (1 millón de euros), a compra e demolición do antigo edificio do centro de saúde de Teis para facer unha biblioteca (300.000 euros), a reforma do Parque de Matías (500.000 euros), ou a reforma da praza de San Mauro en Matamá (600.000 euros), entre outras obras.
Estas obras súmanse ás avanzadas nas últimas horas: melloras en Severino Cobas, un aparcadoiro en Matamá e a humanización da rúa Val Miñor e a contorna do estadio de Balaídos.
CRÉDITO EXTRAORDINARIO
Segundo sinalou o alcalde en rolda de prensa, a modificación para dispor deste crédito extraordinario deberá ser aprobada en Xunta de Goberno, e logo irá a Pleno para a súa aprobación provisional. Tras o período de alegacións, someterase a aprobación definitiva e toda esta tramitación levará un tempo “por baixo de dous meses”, segundo apuntou Caballero, que incidiu en que as obras anunciadas comezarán de forma “inminente”.
CRÍTICAS DA OPOSICIÓN
O anuncio do alcalde de habilitar ese crédito extraordinario foi acollido con críticas por parte dos grupos da oposición, que afearon ao rexedor que anuncie obras con cargo a fondos extraordinarios cando o goberno local apenas é capaz de executar os investimentos recollidos nos orzamentos.
O portavoz do PP, Alfonso Marnotes, denunciou que o goberno local pretende aprobar un crédito extraordinario “ao final do mandato” para obras “que se anuncian e non se farán”, polo que vinculou a decisión coa “posta en marcha da maquinaria de propaganda”.
Na mesma liña, o portavoz de Marea de Vigo, Rubén Pérez, lembrou que o goberno municipal ten sen executar máis de 100 millóns de euros de investimentos e esixiu que se informe sobre o grao de execución doutros créditos extraordinarios aprobados, entre eles o de 46 millóns de euros que recibiu luz verde do pleno en febreiro pasado (cos únicos votos favorables do grupo socialista).
Finalmente, o concelleiro do BNG, Xabier Pérez Igrexas, tamén subliñou que, no primeiro semestre de 2022, o goberno local executou menos do 10 % dos 120 millóns para investimentos previstos no orzamento. “Por tanto, un 90 % de fraude, de fume”, criticou. Segundo recalcou, este “anuncio oportunista” é unha “tomadura de pelo” e unha “frivolidade intolerable”, xa que se aposta por “enterrar” millóns en “gasto inaugurable”, en lugar de dedicar fondos a combater as consecuencias da crise social.
