O xulgado de instrución 5 de Vigo acordou o sobresemento provisional das actuacións iniciadas tras a denuncia interposta pola CIG contra o concelleiro Carlos López Font e o xefe de servizo de Seguridade, A.V.M., ao non apreciarse delitos de prevaricación no decreto aprobado por Xunta de Goberno en febreiro de 2019 (que autorizaba a suspender os descansos dos bombeiros por falta de persoal, e que foi anulado polos xulgados posteriormente).

Segundo informaron fontes xudiciais, a maxistrada de instrución acordou arquivar estas dilixencias ao non aparecer “debidamente xustificada” a perpetración dos delitos de prevaricación administración ou prevaricación por omisión. Así, basea a súa decisión nas declaracións prestadas polos dous investigados neste procedemento, o concelleiro socialista Carlos López Font, que en 2019 era responsable de Seguridade e Mobilidade, e o xefe da área, A.V.M.

No seu auto recolle que o edil declarou que “non houbo ningunha animadversión nin intento de prexudicar dereitos”, e que actuou para garantir a seguridade da cidadanía. Curiosamente, tanto López Font como o xefe da área recoñeceron, segundo se traslada neste auto de arquivo, que o decreto que permitía suspender descansos e impuña ‘de facto’ as horas extraordinarias tiña como finalidade garantir un mínimo de efectivos no servizo de bombeiros, de 20 funcionarios, e aplicaríase no caso de que fose “estritamente necesario”.

EFECTIVOS MÍNIMOS PARA GARANTIR A SEGURIDADE

Segundo sostiveron no xulgado, a escaseza de persoal víñase sorteando mediante a realización de horas extras nos últimos anos, pero “dun día para outro”, os responsables atopáronse con que máis da metade do persoal se negou a facer esas horas extraordinarias.

Así mesmo, Font recoñeceu que, se o número de efectivos dispoñibles é inferior a 20, en caso de sinistro a “indefensión” da cidadanía sería “absoluta”, xa que os bombeiros non poden ser substituídos por outros traballadores. Por iso, apelou ao interese xeral e a necesidade de garantir a seguridade de persoas e bens.

Na mesma liña, o xefe de área admitiu ante a xuíza que sen os reforzos non se podía garantir o mínimo de efectivos e, se non se “forzaban” as horas extras, “non se podería dar servizo á cidade”.

En todo caso, o decreto que deu orixe a esta causa foi anulado por un xulgado do contencioso administrativo de Vigo nunha sentenza que foi posteriormente ratificada polo Tribunal Superior de Xustiza, en dúas ocasións (xa que o decreto foi denunciado dúas veces, polos sindicatos CIG e CUT).