A planta de Stellantis en Vigo iniciou este venres a produción en serie da nova xeración do vehículo comercial lixeiro Fiat Doblò, o primeiro vehículo da marca Fiat que monta a factoría viguesa.

Segundo informou a compañía a través dun comunicado, as primeiras unidades do Fiat Doblò corresponden á versión 100% eléctrica, “respondendo o compromiso de Stellantis coa mobilidade sustentable e eléctrica”. As baterías que equipan ao novo modelo ensámblanse tamén no taller de baterías da planta de Balaídos.

A produción diaria do Fiat Dobrou irá aumentando gradualmente ata alcanzar, en outubro deste ano, as 220 unidades ao día, que é a cadencia máxima programada. Os Fiat Doblò e E-Doblò súmanse ás siluetas das marcas Citroën, Peugeot e Opel/Vauxhall producidas en Stellantis Vigo na liña 2 de Montaxe, sobre a plataforma evolucionada EMP2.

Así mesmo, os compoñentes específicos e distintivos dos novos modelos Fiat integráronse no tecido produtivo dos provedores actuais da familia K9 (furgonetas).

NOVA FURGONETA ELÉCTRICA

O novo E-Doblò é o terceiro vehículo totalmente eléctrico da gama de FIAT e FIAT Professional. Conta cun motor eléctrico de 100 kW, que alcanza unha velocidade máxima de 130 km/h e ata 260 Nm de par máximo. Os Fiat Doblò e E-Doblò ofrecen un paquete completo de sistemas activos de seguridade e ADAS (Advanced Driver Assitance Systems), que os sitúan no top do seu segmento.

O director de Stellantis Vigo, Ignacio Bueno, deu a “benvida” ao novo modelo da marca Fiat, que vén agrandar a oferta da fábrica en utilitarios lixeiros, coas súas versións térmicas e 100 % eléctricas. “Estamos moi orgullosos desta nova industrialización que fará crecer o noso volume de produción, a dos nosos provedores, e apontoará o noso saber facer na fabricación deste tipo de vehículos”, celebrou.