A Federación Olívica de Asociacións de Nais e Pais do Alumnado de Vigo e Comarca (Foanpas) pediu á Xunta que estableza persoal técnico a cargo dos comedores escolares públicos e insistiu na necesidade de aumentar a contía que o Goberno galego achega para a comida de cada alumno.

En rolda de prensa, representantes da xunta directiva de Foanpas subliñaron que o modelo de comedor ao que se debe aspirar en Galicia é aquel que conta con cociña nos colexios, xa que fornece comida “recentemente feita, con produto local e de primeira calidade”, diferenciándose dos comedores con catering. Con todo, este modelo implica certas funcións como a planificación de menús, tendo en conta aquel alumnado con alerxias, ou a elaboración e recepción de pedidos.

Na actualidade, o persoal de cociña está contratado como oficiais de segunda, polo que non lle corresponde realizar estes labores e son os equipos directivos os que teñen que asumir estas tarefas, a pesar de non ter “formación nin tempo” para iso.

Así, o novo decreto que pretende establecer a Xunta, segundo informan desde Foampas, non corrixirá esta situación, xa que os cociñeiros pasarán a estar na escala de auxiliar de cociña, polo que tampouco lles corresponderán estas funcións, que na maioría dos casos si fan debido a que si contan coa dita formación, aínda que non son remunerados por iso.

Por todo iso pediron á Xunta que reformule esta situación e que sitúe o persoal de cociña no rango de técnico, para que poidan realizar todos os labores. Ademais, lembraron que ano a ano varias sentenzas xudiciais recoñecen estes labores que xa realizan os cociñeiros e obrigan ao Executivo autonómico a pagar a diferenza de rango aos traballadores.

MÁIS ACHEGA POR ESTUDANTE

Iria Salvande, presidenta de Foanpas, tamén solicitou un aumento da contía que a Xunta achega pola comida de cada neno, xa que ata agora reparte 2,28 euros por menú, que inclúe primeiro prato, segundo prato e sobremesa, ademais das reparacións e a reposición do enxoval, o cal consideran insuficiente desde a asociación de ampas.

Entre outros temas, tamén mostrou a súa preocupación ao Concello de Vigo, xa que aínda non se publicou a tramitación das bolsas de comedor do curso que vén, polo que as familias aínda non poden solicitalas.

Tal como explicou, anos anteriores esta solicitude podía facerse en maio ou xuño, e agora xa acabou o curso e non se puido facer. Desta maneira, urxiu ao Concello que a poña en marcha, xa que a resolución adoita dilatarse ata outubro nun ano normal, polo que este curso quizá chegue moito máis tarde, obrigando a familias necesitadas a anticipar ese diñeiro, do cal en moitas ocasións non dispoñen.

Na rolda de prensa tamén estiveron presentes José Novoa, en representación do persoal de cociña de comedores escolares, e Juan Carlos Abalde, representando a directivas de colexios, quen apoiaron as solicitudes de Foanpas.