Traballadores de mantemento de zonas verdes de Vigo anunciaron este xoves o inicio dunha folga indefinida a partir do próximo luns, día 20 de xuño, para denunciar a “progresiva precarización” das condicións laborais desde a entrada en vigor da última reforma laboral e os “incumprimentos” do convenio colectivo por parte da concesionaria municipal.

Nunha rolda de prensa, membros do comité de empresa (8 delegados da CIG e 1 de UGT), co seu presidente á cabeza, Alfredo Filgueiras, explicaron os motivos desta convocatoria.

“O noso convenio colectivo establece que o persoal indefinido traballa de luns a venres en xornada intensiva en quenda de mañá, pero por mor da reforma laboral, a empresa (UTE Zonas Verdes Vigo, de Acciona y Mantén) está a facer catro tipos de indefinidos distintos: fixo-descontinuo, que entendemos que non procede porque o noso traballo non ten estacionalidade que o xustificaría; fixo a tempo completo; fixo a tempo parcial con horas complementarias, que traballan cinco horas diarias seis días á semana, e fixo a tempo parcial con xornada irregular”, lamentou Filgueiras.

Para el, isto suporá que unha vez se vaia xubilando o persoal, o servizo irase precarizando en materia de contratación e relacións laborais. Á súa vez, censurou que o Concello de Vigo, que está a pagar 109 traballadores a tempo completo, “mire para outro lado”. Filgueiras tamén criticou a actitude da dirección da UTE, xa que en 15 meses que levan á fronte do servizo “xa hai encima da mesa 37 sancións, superando as rexistradas en todos os anos que leva a concesión”.

Así mesmo, os traballadores consideraron “desproporcionados” os servizos mínimos expostos pola empresa. “Pon unha persoa por equipo, un total de 34 dos 109 que integramos o cadro de persoal, preto do 30%, coa escusa de regar, baleirar as papeleiras e limpar os baños de Samil, Castrelos e O Castro”, criticaron.

Filgueiras lembrou que na primeira folga, convocada en 2005, obtívose unha sentenza xudicial que establecía que nesa concesión non hai lugar a decretar servizos mínimos, porque non se trata dunha actividade esencial para a comunidade. Esta mesma tarde levarase a cabo unha asemblea para decidir as mobilizacións que se desenvolverán durante a folga.