InicioSociedadeA Xunta limita a cuestións "de organización" as deficiencias da residencia 'Mi...

A Xunta limita a cuestións “de organización” as deficiencias da residencia ‘Mi Casa’

Política Social reivindica "a independencia e profesionalidade" do servizo de Inspección e asegura que "non hai matrato" ás persoas residentes.

PUBLICADO O

A conselleira de Política Social e Xuventude, Fabiola García, recoñeceu que os servizos de inspección detectaron deficiencias “de organización” na residencia ‘Mi Casa’ de Pazos de Borbén, pero asegurou que “en ningún caso teñen que ver co trato que reciben os usuarios”.

Así respondeu este mércores no Parlamento galego a conselleira a unha pregunta formulada pola viceportavoz do BNG, Olalla Rodil, quen levou ao pleno as denuncias do colectivo Traballadoras de Residencias de Galicia (TreGa) sobre a “deficiente alimentación” das persoas maiores e a “falta de persoal” no centro, entre outras cuestións.

Neste contexto, a titular de Política Social lembrou que ao longo do mes de maio houbo “varias inspeccións” conxuntas do seu departamento e de Sanidade, a partir das cales se detectaron “varias carencias” e a Administración abriu un expediente por cuestións “de organización” e non “de trato” ás persoas maiores.

Así, García reivindicou “a independencia e profesionalidade” do servizo de Inspección, á vez que acusou á viceportavoz nacionalista de “atacar os profesionais” das residencias e de crear “alarmismo”.

Non en balde, prometeu que a Consellería analiza “todas as denuncias e queixas” que lle chegan en relación cos xeriátricos e lembrou que o plan de inspección para este 2022 contempla un aumento dun 10 por cento das visitas a residencias, “ata superar as 1.500, para que todos, absolutamente todos os centros, sexan da titularidade que sexan, ofrezan unha atención de máxima calidade”.

ÚLTIMAS

A CIG chama ás mulleres da área de Vigo a “tomar as rúas” ao berro de ‘Stop precariedade. Traballo digno e igualdade’

A CIG presentou este luns en Vigo as mobilizacións convocadas en diferentes localidades da comarca con...

(Vídeo) Dioivo rompe o escenario no seu novo videoclip: o metal galego en todo o seu esplendor

O dúo vigués de metal en galego Dioivo acaba de lanzar un novo videoclip para o seu...

‘A Homenaxe’ achegará a música do gaiteiro Julio Vázquez Carril e o baile tradicional de Oliva López López a Vigo

O Grupo Etnográfico A Buxaina de Coruxo celebrará, o próximo sábado 23 de marzo,...

A Xunta pide ao Concello de Vigo “axilizar ao máximo” o seu informe sobre a PXOM

A Xunta de Galicia pediu ao Concello de Vigo que "emende os erros detectados"...