Axentes da Policía Local de Vigo detiveron un cidadán de Portugal, V.R.V.O, de 44 anos de idade, como presunto autor dun delito de violencia de xénero, tras golpear a súa exparella na cabeza cunha pedra.

Segundo informaron fontes policiais, os feitos ocorreron na madrugada do pasado domingo, cando unha patrulla do 092 se atopaba na rúa Uruguai e os axentes escoitaron os berros de auxilio dunha muller.

Nese momento foron abordados por unha muller que presentaba varios golpes na parte posterior da cabeza, e que lles relatou que fora agredida pola súa exparella cunha pedra. Ao mesmo tempo, sinalou aos funcionarios a un home, que tentaba ausentarse do lugar apresuradamente.

Os policías interceptaron o sospeitoso, que explicou que estaba a tentar escaparse para evitar ser agredido pola muller. No entanto, finalmente recoñeceu que atacara a súa exparella.

Os axentes trasladáronse ao lugar onde adoitaba pasar a noite a parella e alí observaron restos de sangue, así como unha pedra, tamén con restos de sangue.

Por estes feitos, procederon á detención do home, como presunto autor dun delito de violencia de xénero, mentres que a muller foi trasladada en ambulancia ao Hospital Álvaro Cunqueiro para ser atendida das súas lesións.