O Consello de Administración do Porto de Vigo abordará na súa reunión deste venres a declaración de extinción por caducidade da concesión outorgada a Estaleiros San Enrique (do Grupo Mariña Meridional) nos terreos da antiga Factorías Vulcano. Esa concesión outorgouse en 2022 por un prazo de 15 anos e nese momento a empresa avanzaba un volume de negocio de 10 millóns de euros anuais e un crecemento de persoal desde os 28 traballadores dese momento ata case os 80.

No plan presentado por San Enrique, proxectábase un volume de negocio de 10 millóns anuais ata 2026 e, cunha taxa de crecemento que lle faría chegar ao final da concesión, en 2036, con case 14,7 millóns de euros anuais. O proxecto industrial contemplaba tamén investimentos por máis de dous millóns de euros para obras nas instalacións, colocación de placas fotovoltaicas, dotación de medios anticontaminación, adecuación de redes de subministración ou maquinaria, entre outros. A validez da concesión estaba suxeita ao estrito cumprimento deses investimentos e condicións.

REPOSTA DA EMPRESA

Ante o anuncio de que a extinción da concesión será levada á reunión do Consello, Estaleiros San Enrique emitiu un comunicado no que tacha dita decisión de “desproporcionada” e manifestou a súa “profunda preocupación”. A empresa asegurou que fixo un investimento de 3,35 millóns de euros nas instalacións, máis outros investimentos en marcha, e que dá emprego directo a 200 persoas. Segundo trasladou, a súa facturación en 2025 foi de máis de 9 millóns de euros e a previsión “confirmada” para 2026 é de 14 millóns, que poden crecer ata os 25 ou 30 millóns cos novos contratos en negociación.

Estaleiros San Enrique explicou que, actualmente, opera con tres liñas industriais e ten varios proxectos en marcha, como a construción dunha rampla ro-ro para o Porto de Santander, a fabricación de estruturas metálicas para outros estaleiros ou un proxecto de fotovoltaica mariña flotante para Naturgy. Igualmente, asegurou que ten dous contratos en fase final de negociación: un cruceiro ‘explorer’ por 40 millóns de euros e un ferry para Noruega por 83 millóns. Por todo iso, a compañía solicitou pospor a tramitación da caducidade e outorgar un prazo razoable para que a Autoridade Portuaria audite a súa situación real e proxección sólida.