A Confederación Galega de Persoas con Discapacidade (Cogami) iniciou en Vigo un curso de almacén e carretilla no que se están formando 15 persoas con certificado de discapacidade ou con certificado de incapacidade laboral para a profesión habitual.
Este curso forma parte do programa de inserción laboral Máis Emprego, dirixido a persoas con discapacidade ou con incapacidade laboral empadroadas na provincia de Pontevedra e con idades comprendidas entre 18 e 62 anos.
Tal como indicou Cogami nun comunicado, o obxectivo é favorecer o acceso ao mercado laboral por primeira vez ou de realizar unha reciclaxe profesional. Esta formación conta cunha duración de 120 horas, das que 50 horas serán impartidas en clases teóricas e 70 horas serán realizadas con prácticas en empresas.
