Iria Piñeiro, Ismael Martínez, Jorge Fernández e Sara Gómez, alumnado do IES A Guía de Vigo, conseguiron o título de ‘mellor empresario virtual de España’ tras enfrontarse a máis de 200 universitarios e estudantes de Grao Superior de distintas partes do Estado, na final estatal da segunda edición de Business Talents, un campionato educativo organizado por Herbalife Nutrition e Praxe MMT.
En segundo e terceiro lugar quedaron tres estudantes do IES Pablo Picasso de Málaga e tres alumnos da Universidade de Vigo, respectivamente. Pola súa banda, o cuarto posto correspondeu a tres alumnos da Universidade Rey Juan Carlos de Madrid, e os quintos clasificados foron outro equipo participante do IES A Guía de Pontevedra.
O alumnado gañador repartiu máis de 7.500 euros en premios, así como diplomas acreditativos, para pór en valor o esforzo realizado na aprendizaxe mediante a práctica que é valorado polas empresas e institucións.
Durante a final deste concurso educativo, un total de 227 universitarios e estudantes de Grao Superior, pertencentes a 26 universidades e centros educativos de España déronse cita en Madrid de maneira presencial.
Os finalistas tiveron que converterse en directivos para demostrar o seu talento empresarial dirixindo unha empresa automobilística a través dun simulador empresarial que permite tomar todo tipo de decisións dentro dunha compañía.
Para gañar, os participantes tentaron alcanzar os máximos beneficios para a súa empresa virtual e convertela na máis próspera fronte ao resto. Para iso tiveron que tomar decisións en tempo real, analizar as oportunidades, así como as diferentes variantes e a competencia, para demostrar que sacaron adiante a mellor compañía.
