InicioSociedadeUn grupo investigador de Vigo, primeiro do mundo en demostrar a eficacia...

Un grupo investigador de Vigo, primeiro do mundo en demostrar a eficacia do litio para tratar a Covid

Aumenta a resposta inmunolóxica e reduce a actividade inflamatoria nas persoas enfermas.

PUBLICADO O

- Advertisement -

Investigadores do hospital Álvaro Cunqueiro de Vigo publicaron un artigo na revista Frontiers of Pharmacology que demostra a eficacia do tratamento con carbonato de litio para persoas enfermas con Covid.

Trátase da primeira investigación mundial que constata os beneficios do litio en pacientes nun ensaio clínico controlado, e recolle os resultados obtidos polo Grupo de Neurociencia Traslacional do Instituto de Investigación Sanitaria Galicia Sur, dirixido polo doutor José Manuel Olivares.

“Estamos moi satisfeitos, xa que isto culmina un importante traballo de investigación que vimos desenvolvendo en diferentes fases durante estes dous últimos anos, e nun contexto asistencial moi complicado”, subliñou Olivares.

Así, desde o inicio da pandemia de Covid, este grupo traballou nesta nova terapia con carbonato de litio, e fixéronse uns primeiros estudos con resultados alentadores, o que animou o persoal investigador a realizar o ensaio clínico.

O carbonato de litio é un fármaco de uso exclusivo baixo prescrición médica que se emprega desde hai 70 anos en distintos cadros psiquiátricos, como o trastorno bipolar, a depresión resistente ou determinados cadros de irritabilidade e axitación. Desde hai un tempo coñécese que ten capacidade para inhibir a replicación de varios tipos de virus, entre eles algúns similares ao SARS-CoV-2.

Outra das súas propiedades é a capacidade para aumentar a resposta inmunolóxica, incrementando os niveis de linfocitos; así como a capacidade de previr e diminuír a actividade inflamatoria (causante princial dos problemas en pacientes máis graves).

ENSAIO CLÍNICO

Para facer este ensaio contouse coa participación dos servizos de Psiquiatría, Medicina Interna, Microbioloxía, Medicina Intensiva e Urxencias do hospital Álvaro Cunqueiro. O grupo recrutou 30 pacientes ingresados con Covid-19 e, de modo aleatorio, asignáronse 15 para recibir a terapia habitual, e outros 15 para ser tratados tamén con litio.

Os resultados indicaron que o litio foi capaz de reducir o número de días de ingreso e o risco de falecemento, así como os síntomas de Covid persistente ao mes do inicio do tratamento. O biólogo Carlos Spuch, outro dos autores do artigo, sinalou que tamén se puido confirmar en laboratorio que os pacientes tratados con litio presentaron un rápido aumento das defensas linfocitarias, e unha redución dos niveis das citoquinas inflamatorias.

Todo iso sen que se rexistrasen efectos secundarios relevantes, o que pon de manifesto que o uso do litio nestes pacientes é seguro. O estudo liderado polo grupo vigués abre un novo campo na investigación de novas terapias fronte ao Covid e mellora as expectativas de control da enfermidade.

ÚLTIMAS

Ordenan prisión para o home que quixo queimar a casa da súa exmuller en Tomiño coa súa filla dentro

O xulgado de instrución número 1 de Tui acordou o ingreso en prisión provisional,...

Arremeten contra unha xornalista no terceiro intento de desaloxo da casa ocupada na rúa Pardavila

Unha muller que estaba a ser desaloxada dunha casa ocupada desde hai anos en...

A Asociación de Dano Cerebral Alento preparará a tortilla máis grande da historia de Vigo” polo seu 25 aniversario

A Asociación de Dano Cerebral Alento elaborará este sábado a tortilla "máis grande da...

O BNG levará unha moción ao Pleno de Vigo para pedir a condena das “accións genocidas” de Israel en Gaza

O grupo municipal do BNG no Concello de Vigo levará unha moción para o...