A factoría viguesa do grupo automobilístico Stellantis volverá parar a partir do luns a produción de furgonetas das súas diferentes marcas debido ás “diversas alteracións na entrega de pezas”, segundo anunciou este xoves a firma a sindicatos.
En concreto, o Sistema 2 da fábrica parará a partir deste venres, polo que non operará a semana que vén. Nel móntanse as furgonetas de marcas como Citroën, Peugeot, Opel, Toyota ou Fiat. Ademais, cancelouse tamén a actividade da quenda de tarde deste venres no taller Ferraje do K9 (nome industrial que reciben as furgonetas), para así “adecuar os encursos ás condicións de peche”.
Pola súa banda, o Sistema 1 tamén sufrirá unha parada dun día, renovando a súa actividade a partir do martes, 5 de abril, aínda sen determinar en que quenda. Nesta liña de produción ensámblanse o Citroën C-Elysée e os Peugeot 301 e 2008. Stellantis renovou este pasado martes a súa produción despois de levar varias semanas coas súas liñas paradas debido á situación de escaseza de compoñentes.
